ಬಂಧನ

ಕನಸಿದೆ ಸೆಳೆತವಿದೆ
ಪ್ರೀತಿ ಹೃದಯಗಳೆರಡರ ಸೇತುವೆಯಾಗಿದೆ
ಯೌವ್ವನವಿದೆ,ಚಲುವಿದೆ
ಪ್ರಣಯ ಪಕ್ಷಿಗಳಾಗಲು ಮದುವೆಯಾಗಿದೆ\\

ಪಾರ್ಕು,ಬೀದಿ ಬೀದಿ ಸುತ್ತಿದ್ದಾಗಿದೆ
ಕಂಡ ಕಂಡದೆಲ್ಲವೂ ಕೈಗೆಟುಕಿಸಿಕೊಂಡದ್ದಾಗಿದೆ
ಕಣ್ಣು ಕಣ್ಣುಗಳಲ್ಲೇ ಮಾತನಾಡುತ್ತಾ,ಮಾತಿಗೆ ನಾಚುತ್ತಾ
ಮೈ ಕೈ ಸೋಕಿಸುತ್ತಾ ರೋಮಾಂಚನಗೊಂಡಿದ್ದಾಗಿದೆ\\

ಯಾರಾದರೂ ನೋಡಿಯಾರೇನೋ!
ಭಯದಲ್ಲಿ ಕಳ್ಳ ಬೆಕ್ಕಿನಂತೆ ಸವಿಯುಂಡಿದ್ದಾಗಿದೆ
ಲೋಕಕ್ಕೆಲ್ಲಾ ತಿಳಿದಿದೆ ನಡುವೆ ಏನೋ ನಡೆದಿದೆಯೆಂದು
ಆದರೂ ಭಿಗುಮಾನ ಏನೂ ಆಗಿಲ್ಲವೆಂಬ ತೋರಿಕೆ ಏಕೋ?\\

ಕಾಮದ ಸೊಕ್ಕು ಮುರಿದಿದ್ದಾಗಿದೆ
ಪ್ರೇಮಕ್ಕೆ ಮಣಿದಿದ್ದಾಗಿದೆ
ಪ್ರೀತಿಗೆ ಶರಣೆಂದು ಬಂದಿಯಾಗಿದ್ದಾಗಿದೆ
ವಾತ್ಸಲ್ಯದ ಚಿಗುರಿಗೆ ನೀರೆರೆದದ್ದಾಗಿದೆ\\