ಮುಂಜಾನೆ ರಾಗ

ಒಂದು ಮುಂಜಾನೆಯಲ್ಲಿ ರವಿ ಕಣ್ಣ ಬಿಡುವ ಮುನ್ನ
ಕೋಗಿಲೆ ಮರಿಯೊಂದು ಮಾವಿನ ಮರದಲ್ಲಿ ಕುಳಿತಿತ್ತು
ಮಧುರ ಕಂಠದಿ ಹಾಡ ಹಾಡುತಿತ್ತು
ಕುಹೂ....ಕುಹೂ... ಗಾನ ಮುಂಜಾನೆಯ ಆವರಿಸಿತ್ತು\\

ಆಹಾ! ಎಂಥ ಮಾಧುರತೆ
ನೀರವತೆಯ ಮರಗಳಲ್ಲಿ ಮಾಧುರ್ಯದ ಮರ್ಮರ
ಗಂಧರ್ವ ಗಾನದ ಲಹರಿಯೇ ಹೊಮ್ಮುತಿತ್ತು
ಬಾನೆತ್ತರಕೆ ಹಾರಿತು ಇಳೆಯ ಗಾನ\\

ಮೈಮನಗಳಲ್ಲಿ ಎಬ್ಬಿಸಿತು ಚೈತನ್ಯದ ಗಾನ
ತೇಲಿ ತೇಲಿ ದೇವಲೋಕದ ರವಿಯ ಸ್ತುತಿಸುತ್ತಿತ್ತು
ಕೋಗಿಲೆಯ ಗಾನಕೆ ಮನಸೋತ ಮುಗಿಲುಗಳು
ಭಾವುಕತೆಯ ಪನ್ನೀರ ಸುರಿಸುತ್ತಿತ್ತು\\

ಕಣ್ಣ ಹೊರಳಿಸಿ ರವಿಯು ಜಗದ ಕಡೆಗೆ ಬಣ್ಣವೆರಚಿ ಬಾನಿಗೆ
ಓಕುಳಿಯಾಟಕ್ಕೆ ಮುನ್ನುಡಿಯ ಬರೆಯುತ್ತಿತ್ತು
ಸುಯ್! ಗಾಳಿ ಆನಂದದಿ ನಲಿದಾಡಿ ಮರಗಿಡಗಂಟಿಗಳಲ್ಲಿ
ದೇವಲೋಕದ ಗಾನವ ಇಳೆಗೆ ಪರಿಚಯಿಸುತ್ತಿತ್ತು\\