ಕೊಳಲ ನೃತ್ಯ

 ಈ ನೋವು ಏಕೋ?

ಮತ್ತೆ ಮತ್ತೆ ನುಸುಳುತ್ತಿದೆ;

ಬೇರೆ ದಾರಿ ಕಾಣದೆ,

ನನ್ನನೇ ಹುಡುಕಿ ಬರುತ್ತಿದೆ ಮಾಧವ ||

 

ಮನಸ್ಸು ನೋವು!

ನೋವು ಮನಸ್ಸು!

ಮನದೊಳಗೆ ಸೇರಿ ಬೆರೆತಿದೆ,

ಕೊಳಲ ನುಡಿಸು ಮಾಧವ||

 

ಕೊಳಲ ದನಿ ಕೇಳುತಿರಲು

ಮನದ ನೋವು ಕರಗುವುದು|

ಒಲವ ಬಳಸಿ ಸೇರುತಿರಲು

ಮನವು ತಕಥೈ ಮಾಧವ||

 

ನಾದವು ಹೊಮ್ಮುತಿರಲು

ಜೀವ ಬಿಡದು ಸುಖವನು|

ನಾದದಲ್ಲಿ ತೇಲುತಿರಲು

ನೋವು ಸುಖವೇ ಮಾಧವ ||

 

ಗಾಳಿಯಲ್ಲಿ ತೇಲಿ ಬರುವುದು

ನಿನ್ನ ಕೊಳಲ ಗಾನ|

ವಿರಹದಿ ಕಾಯುತಿಹೆನು

ನಿನ್ನ ಒಲವ ಕಾಣಲು ಮಾಧವ ||