ದಾರಿ ಕಾಣದಾಗಿದೆ

ಬೆಳ್ಳಂಬೆಳಿಗ್ಗೆ ಕಾಣುವ ಈ ದಾರಿ
ರಾತ್ರಿ ಕಾಣೆಯಾಗುವುದು ಏನು ಸೋಜಿಗ?

ಎಷ್ಟೋ ಬಾರಿ ನಡೆದಿದ್ದೇನೆ
ನಡೆಯುವ ಆ ಸುಖಕ್ಕೆ ಯಾವುದು ಸಾಟಿ?

ಈಗಲೂ ಅದೇ ದಾರಿಯಲ್ಲಿ ಚಲಿಸುತ್ತೇನೆ
ಕಾಲ್ನಡಿಗೆಯಲ್ಲಿ ಅಲ್ಲ ದ್ವಿಚಕ್ರ ವಾಹನದಲ್ಲಿ
ಅನಿಸುತ್ತಿದೆ " ಏನನ್ನೋ ಕಳೆದುಕೊಂಡಿದ್ದೇನೆ"ಎಂದು

ಅಂದು ನಡೆವಾಗ ಆ ಅನುಭವ ಆಪ್ಯಾಯಮಾನ
ಇಂದೇಕೋ ಅದೇ ಆಗಿದೆ ಅಪಾಯಮಾನ

ಬೆಳಿಗ್ಗೆ ಈ ದಾರಿ ಎಷ್ಟು ಸ್ಪಷ್ಟ
ರಾತ್ರಿ ಕಳೆದಿರಲು ಕನಸದಾರಿ ಅಸ್ಪಷ್ಟ

ಏನಾಗಿದೆ ನನಗೆ,ತೋಚದಾಗಿದೆ
ಕನಸ ಕಾಣುವ ಆ ದಾರಿ ಏಕೆ ಕಾಣೆಯಾಗಿದೆ?

ಕನಸು ಕಾಣೆಯಾಗಿದೆ!

ಕನಸುಗಳ ಕದ್ದಿದ್ದಾರೆ
ಯಾರಿಗೆ ದೂರು ಕೊಡಲಿ
ಹುಡುಕಿ ಕೊಡಿ ಎಂದು?
ಒಂದಲ್ಲ,ಎರಡಲ್ಲ ನೂರಾರು ಸ್ವಾಮಿ ಏನು ಮಾಡಲಿ?

ಪ್ರತಿದಿನ ಕಳೆದು ಕತ್ತಲಾಗುವುದಕ್ಕೆ
ಕಾಯುತ್ತಿದ್ದವನು ನಾನು
ಹುಣ್ಣಿಮೆ ಚಂದಿರನ ಬರುವಿಕೆಗೆ
ಶಾಪ ಹಾಕುತ್ತಿದ್ದವನು ನಾನು||

ಎಲ್ಲಿ ಹೋದವೋ ಆ ಕಾಲ?
ನಿಶ್ಚಿಂತೆಯಿಂದ ಕನಸ ಕಾಣುತ್ತಿದ್ದ ಆ ಕಾಲ
ಇಂದೇಕೋ ಮನದಲ್ಲಿ ದುಗುಡವಿದೆ
ಭಯ ಮಡುಗಟ್ಟಿದೆ ಕನಸ ಕಾಣಲು||

ಹೊಸ ಯುಗದ ಜಗವಿದು
ಕಾಣುವ ಕನಸನ್ನೂ ಕದಿಯುವವರ ಕಾಲವಿದು
ಯಾರು ಕದ್ದರೋ ನನ್ನ ಕನಸುಗಳ?
ಯಾವ ಠಾಣೆಯಲ್ಲಿ ದೂರು ಕೊಡಲಿ ಹೇಳಿ?

ಭರವಸೆಯ ಕಿರಣ

ಎಲ್ಲವೂ ಹೋದ ಮೇಲೆ
ನೆನಪ ನೋವ ಅರೆದ ಮೇಲೆ
ಉಳಿವುದೇನಿದೆ?
ಅವನು ಅವಳು
ಅವಳು ಅವನು
ಕಾರಣಗಳು ನೂರಿರಲಿ
ಎಲ್ಲವೂ ಮುಗಿದ ಮೇಲೆ
ಹೇಳುವುದೇನಿದೆ?
ಕಾರಿರುಳು ತುಂಬಿದ ಮನದಲ್ಲಿ
ಬಯಕೆ ಚಿಗುರು ಹೊಮ್ಮಲೆಂದು
ಭರವಸೆಯ ಕಿರಣ ಬಿತ್ತಬಹುದೆ?

ಏಕೆ ರಾಧೆ!ಮೌನಿಯಾದೆ?

ಏಕೆ ರಾಧೆ!
ಮೌನಿಯಾದೆ?
ಏಕೆ ಹೀಗೆ
ಏಕಾಂಗಿಯಾದೆ?
ಎಲ್ಲಿ ಹೋದೆ
ಏಕೆ ಮರೆಯಾದೆ?
ಕೃಷ್ಣನ ಜೀವವಾದೆ
ಕೊಳಲ ದನಿಯಾದೆ
ಬೃಂದಾವನದ ಮಾತಾದೆ
ಪ್ರೀತಿಯ ಪ್ರತಿಮೆಯಾದೆ
ತ್ಯಾಗದ ಧ್ಯೋತಕವಾದೆ
ಏಕೆ ರಾಧೇ
ಮೌನಿಯಾದೆ?

ವೈರಾಗ್ಯ ಘನನಿಧಿ

ವಿರಾಗಿ ಈತ
ಸುಂದರ,ಸದೃಡ
ಅಜಾನುಬಾಹು
ಮಂದಸ್ಮಿತ
ಸುಂದರ ಮನ್ಮಥ ರೂಪ
ಪರಮಾನಂದ ಸ್ವರೂಪ
ದಿಗಂತವೇ ಎಲ್ಲೆ
ಎಲ್ಲವನ್ನೂ ತೊರೆದ
ವೈರಾಗ್ಯ ಘನನಿಧಿ
ಮಹಾಮೂರ್ತಿ
ಗೊಮ್ಮಟಮೂರ್ತಿ||

ಹೊಸ ವರುಷದ ಆಶಯ

ಹೊಸ ವರುಷ ಈ ಲೋಕಕ್ಕೆ
ಹರುಷವಿದೆ ಮನದಲ್ಲಿ
ಏನನ್ನು ನಿರೀಕ್ಷಿಸೋಣ ಹೇಳಿ
ನೂರೆಂಟು ನಿರೀಕ್ಷೆಗಳು ಹೊಸ ವರುಷಕ್ಕೆ
ಹಳೆಯ ವರುಷದ ನಿರೀಕ್ಷೆಗಳೇ ಗಹಗಹಸಿ ನಗುತ್ತಿದೆ,
ನೋಡಿ ಕುಚೋಧ್ಯ ಮಾಡುತ್ತಿವೆ ಹೆಳವನೆಂದು.
ಸಾಧಿಸಿದ್ದಾದರೂ ಏನು? ಬರೀ ಶೂನ್ಯ.....
ಕನಸ ಕಾಣುವುದರಲ್ಲೇ ಕಾಲ ಕಳೆದಿದ್ದೇವೆ
ಇನ್ನು ನನಸಾಗುವ ಮಾರು ದೂರವೇ ಸರಿ;
ವರುಷಗಳುರುಳಲಿ ಬಿಡಿ
ನಾವು ಬದಲಾಗುತ್ತೇವೋ? ಇಲ್ಲವೋ?
ಕಾಲ ಬದಲಾಗುತ್ತಿದೆ
ಮನೆಯ ಕ್ಯಾಲೆಂಡರ್ ಬದಲಾಗುತ್ತಿದೆ
ಹೊಸತನಕ್ಕೆ ಹರುಷಪಡೋಣ;
ಹೊಸತನ ಸ್ವಾಗತಿಸೋಣ;
ನಾವು ಕಾಲನ ಜೊತೆ ನಡೆಯಲಾಗದಿದ್ದರೂ
ಸಾಧ್ಯವಾದಷ್ಟು ತೆವಳೋಣ
ಎಷ್ಟಾದರೂ ಸವೆಸುವ ದಾರಿ ನಮಗಾಗಿಯೇ ಇದೆಯಲ್ಲವೇ!
ಏನೇ ಆದರೂ ಆಶಿಸೋಣ
ನಿಂತ ನೀರಾಗಿರದೆ, ನಿಲ್ಲದೆ ತೆವಳುತ್ತಾ ಬದಲಾವಣೆಗೆ ಮೈ ಒಡ್ಡುವ;
ಹೊಸತನದ ಹಿತಗಾಳಿ ಮನವ ಸಂತೈಸಲು ಅವಕಾಶ ನೀಡೋಣ;
ಹೊಸ ವರುಷ ಬರಲಿ
ಹರುಷ ತರಲಿ;

ಮಾತು ಗೌಣ

ನಾವು ಎತ್ತ ಸಾಗುತ್ತಿದ್ದೇವೋ ಸ್ಪಷ್ಟತೆಯಿಲ್ಲ
ಸ್ವಾತಂತ್ರದಿಂದ ಗುಲಾಮಗಿರಿಯತ್ತಲೋ?
ಅನುಮಾನವಿದೆ,ಇಂದಲ್ಲದಿದ್ದರೂ ಮುಂದೊಂದು ದಿನ....
ನಮ್ಮದೇ ಅಸ್ಥಿತ್ವಕ್ಕೆ ಹೋರಾಡುತ್ತಿದ್ದೇವೆ
ಎಲ್ಲರೂ ನಮ್ಮವರೇ
ಮೈ ಬಣ್ಣ,ಹರಿಯುತ್ತಿರುವ ರಕ್ತ,ಉಸಿರಾಡುವ ಗಾಳಿ
ನಮ್ಮವರೆಂದುಕೊಂಡೆವು
ಆದರೇನಾಯಿತು?
ನಮ್ಮವರು ನಮಗೇ ಶತೃಗಳು
ನಮ್ಮನ್ನು ಗುಲಾಮರಂತೆ ನಡೆಸಿಕೊಳ್ಳುತ್ತಾರೆ;
ನಮ್ಮ ಮಾತಿಗೆ ಕಿಮ್ಮತಿಲ್ಲ;
ನಮ್ಮ ಕೈಗಳನ್ನೇ ಕಟ್ಟಿಹಾಕಿದ್ದಾರೆ;
ಕಣ್ಣುಗಳನ್ನೂ ಮುಚ್ಚಿದ್ದಾರೆ;
ಯಾವ ಬಟ್ಟೆಯಿಂದಲೋ?
ಮೃದುವಾಗಿದೆಯಾದರೂ ಕಠೋರವಾಗಿದೆ;
ಯಾರ ಕೈವಶವಾಗಿಹೆವೋ?
ಮಾತು ಗೌಣ;ಮೂಕ ರೋಧನ;
ಅಸಹಾಯಕರಾಗಿದ್ದೇವೆ;
ಮನದ ನೋವು ನಿಶಬ್ದವಾಗಿದೆ.

ಭೀಭತ್ಸವೆಂದರೆ ಇದೇನೇ.....

ಭೀಭತ್ಸವೆಂದರೆ ಇದೇನೇ.....
ಮುಗ್ಧ ಮಕ್ಕಳ ಹತ್ಯಾಕಾಂಡ ಸಮರ್ಥನಿಯವೇ?
ವಾತ್ಸಲ್ಯ,ಪ್ರೀತಿ,ಕರುಣೆಗೆ ಯಾವುದೇ ಧರ್ಮದ ಸೋಂಕಿಲ್ಲ
ಪ್ರಕೃತಿಯ ಶುದ್ಧ ಪ್ರಮಾಣಗಳೆಂದರೆ ಅವೇನೇ....

ಮೂರ್ಖತನಕ್ಕೆ,ಹೇಡಿತನಕ್ಕೆ,ಗುಂಡಿನ ಮೊರೆತಕ್ಕೆ
ಮುಗ್ಧ ಅಮಾಯಕತೆ ಬಲಿಯಾಗಿರಬಹುದು
ಭಯೋತ್ಪಾದನೆ ಕ್ಷಣಿಕ ಗೆಲುವಿನ ನಗೆ ಬೀರಿರಬಹುದು
ಅದು ನಿಜವಾದ ಗೆಲುವಲ್ಲ,ಶಾಶ್ವತವೂ ಅಲ್ಲ;

ಯಾವುದೇ ಧರ್ಮವಿರಲಿ ಮಾನವೀಯತೆಯೇ ಬುನಾದಿ
ಅನಾದಿಯಿಂದಲೂ ದಯವೇ ಧರ್ಮದ ಮೂಲ
ರಕ್ತ ಪೀಪಾಸುಗಳಿಗೆ,ಸ್ವಾರ್ಥಿಗಳಿಗೆ ಕಾಣಿಸದು
ರಕ್ತ ಹರಿದರೆ,ಭಯ ತೋರಿದರೆ ಲೋಕ ತನ್ನದಾಗದು;

ಹಿಂದೂಧರ್ಮ ಬಿಕ್ಕಿತ್ತಿದೆ;
ಇಸ್ಲಾಂ ಧರ್ಮ ಕಣ್ಣೀರಿಡುತ್ತಿದೆ;
ಕ್ರಿಶ್ಚಿಯನ್ ಧರ್ಮ ನರಳುತ್ತಿದೆ;
ಮಾನವೀಯತೆಯ ಮೇಲೆ ಬಿದ್ದ ಕರಿನೆರಳಿಗೆ
ಅಮಾಯಕ ಮಕ್ಕಳ ಮಾರಣಹೋಮಕ್ಕೆ.......

ಮನದ ದ್ವಂದ್ವ

ಏನು ಹೇಳಬೇಕೋ ತೋಚುತ್ತಿಲ್ಲ
ಹೌದೆನ್ನಲೋ? ಇಲ್ಲವೆನ್ನಲೋ?
ಮನದ ದ್ವಂದ್ವ ಕದನವಾಡುತ್ತಿದೆ ಹಿಂಸಿಸುತ್ತಾ
ನನ್ನ ಕಷ್ಟ ನನಗೆ
ಮನದ ಹಿಂಸೆ ದಾರಿತೋರದೆ ಮರುಗಿದೆ
ಯಾವುದ ಅಪ್ಪಲಿ;
ಯಾವುದ ತೊರೆಯಲಿ;
ಕಾಲವೇ ಹೇಳಬೇಕೆಂದು ಬಯಸಲೇ?
ಒತ್ತಡ ಮನದಲ್ಲಿ ನೂರು
ಬತ್ತದ ಭರವಸೆಗೆ ಹೊಸವರಸೆ
ಯಾವುದು ಆರಂಭವೋ?
ಯಾವುದು ಕೊನೆಯೋ?
ಚಿಂತಿಸುವ ಮನಕ್ಕೆ ಎಲ್ಲವೂ ಶೂನ್ಯವೇ!
ಒಂದು ಎರಡಾಗಲಿ;
ನೂರು ಇನ್ನೂರಾಗಲಿ;
ನನ್ನದೇ ದಾರಿಯಲ್ಲಿ ನಡೆವೆ
ಚಿಂತೆಯ ದ್ವಂದ್ವ ಹೊಡೆದೋಡಿಸುವೆ||

ಮನದ ಕದನ

ಭೂಮಿಯ ಮೇಲೆ ಒಂದೊಂದೇ ಹೆಜ್ಜೆ ಇಡುತ್ತಿದ್ದೇನೆ
ನಡೆದಷ್ಟೂ ದೂರ ಸವೆಯದ ಹಾದಿ;
ಶೂನ್ಯ ತುಂಬಿದ ಮನ;
ತಂತಿ ಹರಿದ ವೀಣೆ;
ಮುರಿದ ಎಲುಬುಗಳ ಗೂಡು;
ದೃಷ್ಟಿಹೀನ ಕಣ್ಣುಗಳು;
ತಪ್ಪುದಾರಿಯಲ್ಲೇ ನಡೆದು,ಸರಿದಾರಿಯ ಇಷ್ಟಪಡುವವನು;
ರಕ್ತನೆರೆತ ಮಣ್ಣು;
ಈ ಮಣ್ಣಿಗೋ ಇಲ್ಲ ಆ ಮನಕ್ಕೋ ದಾಹ ಇನ್ನೆಷ್ಟೋ?
ಸ್ವಾರ್ಥಕ್ಕೋ ಇಲ್ಲ ಬಯಕೆಗೋ?
ಯುದ್ಧ ಭೂಮಿಯಲ್ಲಿ ಸಾಲು ಸಾಲು ಪ್ರಾಣಹಾರಿದ ದೇಹಗಳು;
ಬಿಕ್ಕುತ್ತಿರುವ "ದೇವನಾಂಪ್ರಿಯ ಅಶೋಕ"
ಕೈಯಲ್ಲಿ ನೆತ್ತರು ಸುರಿಸುತ್ತಿರುವ ಕತ್ತಿ-ಬಯಸಿದೆ ಮತ್ತಷ್ಟು ರುಧಿರ;
ರೋಧನ,ಆಕ್ರಂಧನ,ನೋವು,ಹಿಂಸೆ,ಹತಾಶೆ......
ಮತ್ತೆ ಬಾರದ ಜೀವಗಳು-ಸಾಮ್ರಾಜ್ಯದಾಹಿಯ ನರ್ತನ;
ಗಳಿಸಿದ್ದೇ ಗಳಿಸಿದ್ದು-ನಡೆದದ್ದೇ ನಡೆದದ್ದು
ಸಾವು ಅಪ್ಪಿದ ಹೆಣಗಳ ಮೇಲೆ,ಮಾನವೀಯತೆಯ ಸಮ್ರಾಜ್ಯದ ಮೇಲೆ;
ಬೊಬ್ಬೆ ಇಡು ಇಲ್ಲ ಗಹಗಹಸಿ ನಗು,
ಎಲ್ಲವೂ ಶೂನ್ಯ ರಣರಂಗದಲ್ಲಿ;
ಎದುರಿಗೆ ಬರುವವರೆಲ್ಲರೂ ಶತೃಗಳೇ ರುಂಡ ಉರುಳಲೇ ಬೇಕು
ಒಂದೋ ಎದುರಿನವರದು ಇಲ್ಲ ನನ್ನದು.....
ಶಾಂತಿ ಮಂತ್ರ ಪಠಿಸುವ ಬುದ್ದನೂ ಸಂತೈಸಲಾರ
ಶರಣು,ಶರಣು ಹೊಡೆದರೂ ಮರುಗಲಾರ
ಬೋಧಿವೃಕ್ಷದ ಕೆಳಗೆ ಧ್ಯಾನ
ಮುಂದುವರೆಯಲಿ ಮನದ ಕದನ||

ಗಳಿಕೆ ಕ್ಷಣಿಕ

ಇಂದು ಏನಾಗುವುದೋ ಆಗಲಿ
ಎಲ್ಲಕ್ಕೂ ಸಿದ್ಧವಾಗೇ ಇದ್ದೇನೆ
"ಮಾಡು ಇಲ್ಲವೇ ಮಡಿ" ಎನ್ನುವುದಿಲ್ಲ
ಮಾಡುವ ಇರಾದೆ ಇದೆಯೆ ಹೊರತು
ಮಡಿಯುವ ಚಿಂತೆಯಿಲ್ಲ
ಮಾಡೇ ಮಡಿಯುವ
ನೋವು ಅನುಭವಿಸುವುದಕ್ಕೆ ಸಿದ್ಧ
ಏನನ್ನಾದರೂ ಗಳಿಸಲು ಸ್ವಲ್ಪ ಏನನ್ನಾದರೂ ಕಳೆದುಕೊಳ್ಳಲೂ ಸಿದ್ಧ
ಕಳೆದುಕೊಳ್ಳುವುದರಲ್ಲಿಯೇ ಸುಖ ಅಡಗಿದೆ ಗಳಿಸುವುದರಲಿಲ್ಲ||