ಜನನ ಮರಣ

 

ಈ ಉಸಿರಾಟ ನಡೆದಿದೆ ನಿಲ್ಲದೆ,

ಭಾರವೋ?, ಹಗುರವೋ?

ಬಲ್ಲವರಾರು?, ಹೇಳುವರಾರು?

 

ಶತಶತಮಾನಗಳ ಮೌನ - ಶಾಂತ, ಪ್ರಶಾಂತ,

ಮೌನ ಮಡುಗಟ್ಟಿದೆ  -  ತಳಮಳವಿಲ್ಲದೆ!,

ಇತಿಹಾಸದ ಪುಟಗಳಲ್ಲಿ ನೋವು ತುಂಬಿದೆ,

ನೋವು, ರುಧಿರ ಹರಿದು ಮೌನ ತಾಳಿದೆ

 

ಸಮಯ ಓಡುತ್ತಲೇ ಇದೆ - ಕಾಲಚಕ್ರ,

ನಾವು ಹಿಂದೆ ಬಿದ್ದಿದ್ದೇವೆ - ಕುದುರೆ ಹತ್ತಲು,

ಒಂದು ನೋಟ, ಒಂದು ಪದ,

ಮನದಲ್ಲಿ ಮೌನ ಹರಡಿದೆ

 

ಜಗತ್ತು ತಿರು, ತಿರುಗುತ್ತಲೇ ಇದೆ,

ವಿರಾಮ ನಿರೀಕ್ಷಿಸುತ್ತಿದೆ - ನಿಲ್ಲಲೆಂದು,

ರಾತ್ರಿ - ಹಗಲು ಕಾಲಚಕ್ರ ತಿರುಗುತ್ತಿದೆ,

ನೋಡ ನೋಡುತ್ತಲೇ ಭ್ರಮೆ ಆವರಿಸಿದೆ

 

ಜನನ ಮರಣದ  ಉಸಿರಾಟ,

ಎಲ್ಲವೂ ಕೌತುಕ - ಅರ್ಥ ಅಗಾಧ.