ಪ್ರೇರಣೆ ನೀನೇ ಆಗು!

ಆರೋಗ್ಯ,ಸಂತೋಷ,ಆಂತರಿಕ ತೃಪ್ತಿ,

ಉದ್ದೇಶಪೂರ್ಣ ಜೀವನವು ಹಾದಿ ತೆರವುದು.

ಪ್ರಶ್ನೆ ಇದೆ ಮನದಲ್ಲಿ ಚಿಕ್ಕದಾದರೂ ಹಿರಿದು,

ದಾರಿ ಹುಡುಕು, ನಿನ್ನ ಜೀವನದ ಶಿಲ್ಪಿ ನೀನೇ.

 

ಸಮಯ, ಹಣ, ಪ್ರತಿಭೆ, ಜೀವನ ಕಟ್ಟಿಕೊಳ್ಳಲು,

ಕಾಲ ಮುನ್ನಡೆಯಲು ಎಲ್ಲವ ಕೊಡು ಸಮಾಜಕ್ಕೆ,

ತೃಪ್ತಿಯ ಕಂಡುಕೋ, ನೋವುಂಡವರ ಕಣ್ಣೀರ ಒರೆಸಿ,

ಸಹಾಯ ಹಸ್ತವ ಚಾಚು, ಸಹಾಯ ಬೇಡಿ ಬಂದವರಿಗೆ.

 

ಬೇಸರದ ಹೊತ್ತಿನಲ್ಲಿ ಸಾಂತ್ವನವ ಹಂಚು, ಬೆಳಕು ಹರಡು, 

ಮಾತುಗಳ ಹಿಂದಿನ ನೋವ ತಿಳಿ, ಹೃದಯದ ಬಾಗಿಲು ತೆರೆ. 

ಸ್ವಾರ್ಥವಿಲ್ಲದೆ ಸೇವೆಯ ತೆರದಲಿ ಕಾಯಕದಲ್ಲಿ ನಿರ್ಲಿಪ್ತನಾಗು, 

ಮನಕೆ ಆನಂದ ನೀಡುವ ಕಾಯಕವೇ ಬೆಳಕ ಹಾದಿಯಾಗಲಿ. 

 

ಅವಮಾನ, ವಿಫಲತೆ, ಸಂಕಟಗಳೆಲ್ಲಾ ಪಾಠಗಳಾಗಲಿ, 

ಅನುಭವದ ಹಾದಿಯಲ್ಲಿ ಬೆಳೆಯಲಿ ವ್ಯಕ್ತಿತ್ವ ನಿರ್ಮಾಣ. 

ದಿನದಿನವೂ ಹೊಸ ಕನಸು, ಹೊಸ ಪ್ರಯತ್ನದ ಹೆಜ್ಜೆ, 

ಜೀವನದ ಉದ್ದೇಶವ ಹುಡುಕುವ ಪಯಣವೇ ಧರ್ಮ. 

 

ಅಂತರಂಗದ ಶಕ್ತಿ ನಂಬಿಕೆಯಡಿಯಲ್ಲಿ ಮೂಡಲಿ, 

ಅಜ್ಞಾತ ದಾರಿಯಲಿ ಸಹಜತೆ ನಿನ್ನ ದೀಪವಾಗಲಿ. 

ನಿನ್ನ ಹೆಜ್ಜೆಗಳಲ್ಲಿ ಸತ್ಯ, ನಿನ್ನ ನೋಟದಲ್ಲಿ ದಯೆ, 

ಈ ಲೋಕದ ಬದಲಾವಣೆಗೆ  ಪ್ರೇರಣೆ ನೀನೇ ಆಗು.