ನೀವು ನನಗೆ ಬೆಳೆಯಲು ಅಡ್ಡಿಪಡಿಸಬಹುದು
ಅವಕಾಶಗಳ ನೀಡದೆ ಬಾಗಿಲು ಮುಚ್ಚಬಹುದು
ಪ್ರತಿದಿನ ಪ್ರತಿ ಹೆಜ್ಜೆಯಲ್ಲೂ ತೊಂದರೆ ನೀಡಬಹುದು
ಬನ್ನಿ ನಿಮಗೆ ಸ್ವಾಗತ, ಆದರೂ ನನ್ನ ಪ್ರಯತ್ನ ಮುಂದುವರೆಸುವೆ||
ನನ್ನ ತಾಳ್ಮೆ, ಸಹನೆ ನಿಮಗೆ ಮತ್ತೂ ಪ್ರೇರೇಪಿಸಬಹುದು
ನನ್ನನ್ನು ಮತ್ತಷ್ಟು ಹಿಂದೆ ತಳ್ಳಲು ಪ್ರಯತ್ನಿಸಬಹುದು
ಕೆಲಸಕ್ಕೆ ಬಾರದವನೆಂದೂ , ಹಳೆಯವನೆಂದು ತಿರಸ್ಕರಿಸಬಹುದು
ಬನ್ನಿ ನಿಮಗೆ ಸ್ವಾಗತ, ಆದರೂ ನನ್ನ ಪ್ರಯತ್ನ ಮುಂದುವರೆಸುವೆ||
ಹೃದಯಭಗ್ನಗೊಳ್ಳುವ ಮಾತುಗಳನ್ನಾಡಬಹುದು
ಮಾಡದ ತಪ್ಪಿಗೆ ಅವಮಾನವನ್ನೂ ಮಾಡಬಹುದು
ಎನಗಿಂತ ಕಿರಿಯರಿಗೆ ಮನಬಿಚ್ಚಿ ಪ್ರೇರಣೆ ನೀಡಬಹುದು
ಬನ್ನಿ ನಿಮಗೆ ಸ್ವಾಗತ, ಆದರೂ ನನ್ನ ಪ್ರಯತ್ನ ಮುಂದುವರೆಸುವೆ||
ಮುಗುಳ್ನಗುವ ನನ್ನ ಮುಖನೋಡಿ ನೀವು ಸಿಂಡರಿಸಬಹುದು
ನನ್ನ ದಾರಿ, ನನ್ನ ಕೆಲಸ ಕಂಡು ದ್ವೇಷಮಾಡಬಹುದು
ಎಷ್ಟು ತುಳಿದರೂ ನಗುತ್ತಿರುವೆನೆಂದು ಸಂಕಟಪಡಬಹುದು
ಬನ್ನಿ ನಿಮಗೆ ಸ್ವಾಗತ, ಆದರೂ ನನ್ನ ಪ್ರಯತ್ನ ಮುಂದುವರೆಸುವೆ||
ನಿಮ್ಮ ಮಾತುಗಳಿಂದ ನೋವಾಗುವಂತೆ ಚುಚ್ಚಬಹುದು
ನಿಮ್ಮ ಕಣ್ಣ ನೋಟದಿಂದಲೇ ಸುಡಬಹುದು
ನಿಮ್ಮ ದ್ವೇಷಭಾವನೆಗಳಿಂದಲೇ ನನ್ನ ಸಾಯಿಸಬಹುದು
ಬನ್ನಿ ನಿಮಗೆ ಸ್ವಾಗತ, ಆದರೂ ನನ್ನ ಪ್ರಯತ್ನ ಮುಂದುವರೆಸುವೆ||
ನನ್ನ ದಾರಿ ನನಗೆ ತಿಳಿದಿದೆ
ನನ್ನ ದಾರಿ ನನ್ನ ಗುರಿಯ ಕಡೆಗೆ
ಇಂದಲ್ಲದಿದ್ದರೇನೆಂತೆ ಭರವಸೆ ನನಗಿದೆ ನಾಳೆ ನನ್ನದೇ
ಬನ್ನಿ ನಿಮಗೆ ಸ್ವಾಗತ, ಆದರೂ ನನ್ನ ಪ್ರಯತ್ನ ನಿರಂತರ||
No comments:
Post a Comment