ಬಯಕೆ

ಹುಣ್ಣಿಮೆಯ ಬೆಳಕಲ್ಲಿ ತಾರೆಯರೊಡನೆ
ನೀನಿರಬೇಕೆಂದು ಬಯಸುವೆ
ಒಂದು ದಿನ ನಿನ್ನ ಬಾಹುಬಂದನದ ಬಿಸಿಯಪ್ಪುಗೆಯ ಪರಿಭಾವಿಸುವೆ
ಮತ್ತೆಂದೂ ಕಣ್ಣೀರು ಈ ಕಂಗಳಿಂದ ಸುರಿಯಲಾರವು||

ಪ್ರೇರಣೆ: Kari Johnston.

ಹಣೆಯ ಬರಹ

ಹಣೆಯ ಮೇಲೆ ನೂರೆಂಟು ಬರೆದಿಹನಂತೆ
ಆ ಬ್ರಹ್ಮ ಕಾಣದ ಅಕ್ಷರಗಳಿಂದ
ಸೋಲುಗಳು ನಮ್ಮನಾವರಿಸಿದಾಗ
ಎಲ್ಲರೂ ಹೇಳುವರು ತಾವೇ ಬರೆದವರಂತೆ
ಅದೇ ಗೆಲುವಿನ ನಗೆ ಬೀರಿದಾಗ
ಅದೃಷ್ಟವೇ ಅವನ ಕೈ ಹಿಡಿಯಿತೆನ್ನುವರು ಬೆನ್ನ ಹಿಂದೆ
ಪಟ್ಟ ನೋವು,ಶ್ರಮ,ದೃಡಚಿತ್ತ ಕಂಡೂ ಕಾಣದ ಹಾಗೆ||

ಕೊಳಲನೂದು ಮಾಧವಾ

ಕೊಳಲನೂದು ಮಾಧವಾ
ಮನದ ಕೊಳೆಯ ಕಳೆಯೋ ಕೇಶವಾ
ನಿನ್ನ ಕಾಣದ ಕಂಗಳ ಕತ್ತಲ ಕಖೆಯೋ ಗೋಪಾಲಾ
ಮುರಳಿಯ ನಾದ ಮನವ ನಡೆಸಲು
ಕೊಳಲನೂದು ರಾಧಾಮಾಧವಾ||

ಗೆಳೆತನ

ಇಂದೇಕೋ ಮನದಲ್ಲಿ ಪುಳಕ
ಎಂದೂ ಕಾಣದ ಚೈತನ್ಯದ ಬೆಳಕು
ಕಾರಣ ಹುಡುಕುತ್ತಾ ಅನ್ವೇಷಿಯಾದೆ
ಉತ್ತರ ಕಂಡುಕೊಂಡೆ.....
ಏನು ಗೊತ್ತಾ?....
ಗೆಳೆಯರೆ ನೀವೆಲ್ಲಾ ನನ್ನ ಜೊತೆಗಿದ್ದೀರಿ....
ಗೆಳೆತನಕ್ಕೆ ಎಣೆಯುಂಟೇ?.....

ಕಾಣದ ದಾರಿ

ಬೇರೆ ದಾರಿ ಇಲ್ಲದೆ ಹೃದಯ ಕರೆದ ಕಡೆ ಹೊರಳಿದೆ
ಕಣ್ಣಿಗೆ ಕಾಣುವ ದಾರಿ ಕತ್ತಲಲ್ಲಿ ಬೆತ್ತಲಾಗಿ ನರಳಿದೆ
ಮನಸ್ಸು ಯಾವ ಕಡೆಯೂ ಹೊರಳಲಾರದೆ ತೊಳಲಿದೆ
ಎತ್ತಲೋ ಸಾಗಿ ಶಾಂತಿಯ ಅರಸುತ್ತಾ ಅಲೆದಿದೆ||

ಮನಸ್ಸು

ಬೇಡ ಬೇಡವೆಂದರೂ ಏಕೆ ಹೀಗೆ?
ಬೇಕು ಬೇಕುಗಳ ಬಯಲಿನ ಹಿಂದೆಯೇ ಓಡುವುದು
ರೇಜಿಗೆ ಬಿದ್ದ ಮಗುವಿನಂತೆ ಹಠಮಾರಿ ಈ ಮನಸ್ಸು
ಉಬ್ಬು-ತಗ್ಗುಗಳ ರಸ್ತೆಯಲ್ಲಿ ಹರೆಯದ ಹುಡುಗರು
ಓಡಿಸುವ ಗಾಡಿಯಂತೆ ಭಂಡ ಧೈರ್ಯದ ಮನಸ್ಸು
ಹಿಡಿದ ಹಠವ ಬಿಡದ ಛಲದಂಕ ಮಲ್ಲ
ತಪ್ಪಾಗಿ ನೋವಾಗುವವರೆಗೂ ಪಾಠ ಕಲಿಯದು ಈ ಮನಸ್ಸು 

ಏಕೆ ಮರುಳಾದೆ ರಾಧೆ?

ಏಕೆ ಮರುಳಾದೆ ರಾಧೆ?
ಶಾಮನ ನೋಟಕೆ;
ಮಾತಿನ ಮೋಡಿಗೆ
ಏಕೆ ಕಳೆದು ಹೋದೆ?

ಹುಣ್ಣಿಮೆಯ ಚಂದ್ರಿಕೆಯ ಸೊಬಗು
ಕರಿಮೊಗದ ಶಾಮಗೆ ಆಯಿತೇ ಬೆರಗು!
ಏಕೆ ಮರುಳಾದೆ ರಾಧೆ?
ಏಕೆ ಕಳೆದು ಹೋದೆ?

ಆವ ಪುರುಷಗೂ ಒಲಿಯದ ಮನ
ಗೋಕುಲ ನಂದನನ ಬಯಸಿತೇಕೆ ಮನ!
ಏಕೆ ಮರುಳಾದೆ ರಾಧೆ?
ಏಕೆ ಕಳೆದು ಹೋದೆ?

ಪ್ರೀತಿಗೆ ಅನ್ವರ್ಥ ನೀನು
ಕಂಡೆ ಶಾಮನಲ್ಲಿ ಒಲುಮೆ ಜೇನು
ಏಕೆ ಮರುಳಾದೆ ರಾಧೆ?
ಏಕೆ ಕಳೆದು ಹೋದೆ?

ಆವ ಜನುಮದ ಬಯಕೆಯೋ?
ಶಾಮನೇ ಇನಿಯನಾಗುವ ಒರತೆಯೋ?
ಏಕೆ ಮರುಳಾದೆ ರಾಧೆ?
ಏಕೆ ಕಳೆದು ಹೋದೆ?

ಒಂದು ಚಣದ ಅಂದ

ಒಂದು ಚಣದ ಅಂದ ಮನದಲ್ಲಿ ತುಂಬುವುದು ಕೊನೆಯಿರದ ಆನಂದ
ಅದರ ಮನಮೋಹಕತೆಗೆ ಕೊನೆಯುಂಟೆ!;ಎಂದೂ ಶೂನ್ಯ ಭಾವ ತೋರದು
ಅದರೂ ನಮ್ಮೊಳಗೆ ಶಾಂತತೆಯ ತರುವುದು;ನಿದ್ದೆಯೊಳಗೂ
ಪೂರ್ತಿ ಸಿಹಿ ಕನಸುಗಳು,ಆರೋಗ್ಯ ಹಾಗು ಶಾಂತತೆಯ ಕಡಲು;

ಪ್ರೇರಣೆ: A thing of beauty by John Keats.

ಬೆಂಕಿ ಮತ್ತು ನೀರು

ಕೆಲವರು ಬೆಂಕಿ ಎಂದು
ಮತ್ತೆ ಕೆಲವರು ನೀರೆಂದು
ಪ್ರಳಯಕ್ಕೆ ಕಾರಣವೆಂದು ವಾದ-ಪ್ರತಿವಾದ
ನನ್ನನುಭವದ ಒರತೆಗೆ
ಬೆಂಕಿಯ ಮೇಲೆಯೇ ಒಲವು
ದ್ವೇಷದ ಕೆನ್ನಾಲಗೆಯ ಪರಿಚಯವಿದೆ
ವಾದವೋ-ಪ್ರತಿವಾದವೋ?
ಬೆಂಕಿಯೋ? ಜಲಪ್ರಳಯವೋ?
ಯಾವುದಾದರೂ ಸರಿಯೇ ಜೀವಸೆಲೆಗೆ ಸಂಚಕಾರ||

ಪ್ರೇರಣೆ:Fire & Ice by Robert Frost

ಓಹ್! ಇನ್ನೆಷ್ಟು ದಿನ ಈ ಸಂಕಟ

ಓಹ್! ಇನ್ನೆಷ್ಟು ದಿನ ಈ ಸಂಕಟ
ಇನ್ನೆಷ್ಟು ದೂರ ಸಾಗಬೇಕೋ?
ಒಂದೊಂದು ಹೆಜ್ಜೆಯಲ್ಲೂ
ಅಬ್ಬಾ ಎಷ್ಟು ಯಾತನೆ!
ಸಹಿಸಲೇ ಬೇಕು ತೆವಳಲು
ಓಹ್! ಆ ದಿನ ಬಂದೇ ಬರುವುದು
ಅವನು ಬಂದು ನಮ್ಮ ನೋವ ಸಂತೈಸುವನು||

ಸುಖದ ಸುಪ್ಪತ್ತಿಗೆಯಲ್ಲೇ ಮಿಂದವರಾರು?
ನೋವ ಮೆಟ್ಟಿಲುಗಳ ಹತ್ತದೆ
ನರಕ ಸಾಟಿದ ಮೇಲೆ ಸ್ವರ್ಗ ಸಿಗುವುದು
ನೋವಲ್ಲಿ ಬೆಂದ ಮೇಲೆ
ಮತ್ತೆ ಏನು ಬೇಕು?
ಓಹ್! ಆ ದಿನ ಬಂದೇ ಬರುವುದು
ಅವನು ಬಂದು ನಮ್ಮ ನೋವ ಸಂತೈಸುವನು||

ಆಶಯ

ಅವನಿಗಾಗಿಯೇ ಕಾಯುತ್ತಿದ್ದೆ;
ಮುಂದೆಯೂ ಕಾಯುತ್ತೇನೆ;
ಎಷ್ಟೋಂದು ಅನುಭವದ ಮೂಟೆ ಹೊತ್ತಿದ್ದೇನೆ;
ಎಲ್ಲವನ್ನೂ ಅವನ ಮುಂದೆ ಬಿಚ್ಚಿಡಲು;
ಬೇಕು,ಬೇಡಗಳ ಗಂಟು ಕಟ್ಟಿದ್ದೇನೆ;
ಏಕೆಂದರೆ ಅವನಿಗೆ ಏನು ಬೇಕೆಂದು ತಿಳಿದಿಲ್ಲ;
ಒಂದು ನಂಬಿಕೆ,ಮತ್ತೊಂದು ಪ್ರಾಮಾಣಿಕತೆ
ಅಷ್ಟೇ ಗೊತ್ತು ನನಗೆ;
ಎಲ್ಲವನ್ನೂ ಅವನು ಸ್ವೀಕರಿಸುತ್ತಾನೆ
ಎಂಬ ಆಶಯವಷ್ಟೇ ಮನದಲ್ಲಿ ಇದೆ||