ಯಾರ ಪ್ರೀತಿಯ ವಶವಾಗಿಹೆ?

ನೀ ಬರುವೆಯೆಂದು ಕಾದಿಹೆನು ಕಾತರದಿ
ಕಾಣದೆ ಬಲುದಿನಗಳಾದವು ಬಳಿಬಾರಾ
ಕಾಡಿದೆ ಮನ ನಿನ್ನ ಕಾಣದೆ,ನೊಂದಿದೆ ಮನ
ವಿರಹದಿ ನೊಂದು ಬಳಲಿಹೆನು ಬಾರಾ ಮಧುರ ಬಾಲಾ||

ಎಲ್ಲಿರುವೆ ಚಂದ್ರನೆ? ಮದನ ಮೋಹನನೇ?
ಎಲ್ಲಿರುವೆ ಮುಕುಂದನೆ? ಹೃದಯ ಗಾನ ಮುರುಳಿಯೇ?
ಪರೀಕ್ಷಿಸುವ ಈ ಪರಿ ಸರಿಯೇ? ನ್ಯಾಯವೆ?
ಮುಖತೋರಿ ಸಲಹಬಾರದೇ ಗೋಕುಲ ಬಾಲಾ||

ಯಾರ ಪ್ರೀತಿಯ ವಶವಾಗಿಹೆ?
ನಿನ್ನ ಕಾಣದ ಈ ಕಂಗಳು ಕುರುಡಾಗಿವೆ
ಬಂದು ದಾರಿ ತೋರಬಾರದೇ?
ನಿನ್ನೊಲವ ಮಾತುಗಳಿಗೆ ಕಿವಿಗಳು ಹಂಬಲಿಸಿವೆ
ಕರುಣೆ ನಿನಗೆ ಬಾರದೇ?
ಎಲ್ಲಿ ಮರೆಯಾದೆ ಎನ್ನ ಹೃದಯದರಸನೇ?
ಎದುರು ಬಂದು ನಿಲ್ಲಬಾರದೇ ಗೋಪಾಲ ಬಾಲಾ||