ಹೆಣ್ಮನದ ನೋವಿನ ದನಿ

ಎಷ್ಟೊಂದು ಕೈ ಗುರುತು
ಬಣ್ಣ ಬಣ್ಣದ ಕೈ ಗುರುತು
ಗೋಡೆಯ ಮೇಲೆ ಚಿತ್ತಾರದ ಭಾವಗಳು ಕಲೆತು
ಹೆಣ್ಮನದ ಭಾವನೆಗಳೆಲ್ಲಾ ಬಣ್ಣದಲ್ಲಿ ಬೆರೆತು
ಆವುದರ ಹೆಗ್ಗುರುತಾಗಿ ಮೂಡಿಹುದೋ?

ಕರಗಿಹೋದ ಅಬಲೆಯರ ಚಿತ್ರವೋ?
ಎದುರಿಸುವ ಸಬಲೆಯರ ಸಂಕೇತವೋ?
ಬಾಡಿಹೋದ ಹೂಗಳ ನೆನಹೋ?
ಆತ್ಮವಿಶ್ವಾಸದ ಮಾನಿನಿಯರ ಚೈತನ್ಯವೋ?
ಚಿತ್ತಾಕರ್ಷಕ ಕಲಾಕೃತಿಯಾಗಿ ಒಡಮೂಡಿದೆ!

ಬಣ್ಣಬಣ್ಣದ ಹೆಗ್ಗುರುತು ಹೇಳುತಿದೆ
ನೂರು ನೋವಿನ ಕಥೆಗಳ ಮೌನವಾಗಿ
ಶಾಂತಿ ಸಂದೇಶದ ಸಂಕೆತವಾಗಿ ಮೂಡಿದೆ
ಆತ್ಮಸ್ಥೈರ್ಯದ ಕುರುಹಾಗಿ ಅಭಿವ್ಯಕ್ತಿಗೊಂಡಿದೆ
ಮೌನವಾಗಿ ನರಳಿದ ಹೃದಯಗಳಿಗೆ ಸಮಾಧಾನ ತಂದಿದೆ||

ನೋವುಂಡವರ ದನಿಯಾಗಿ
ನಾವಿದ್ದೇವೆ ನಿಮಗಾಗಿ
ಹೆದರದಿರಿ,ಬೆದರದಿರಿ;
ಸಮರ್ಥವಾಗಿ ಎದುರಿಸಿ ಶೋಷಣೆಯ
ಅಸಮಾನತೆ,ದೃಷ್ಟಿಕೋನ ಬದಲಾಗಬೇಕೆಂಬ ಧೋರಣೆ
ಮೌನವಾಗಿ ಚಿತ್ತಾರದ ಕಲಾಕೃತಿಯಾಗಿ ಮೂಡಿದೆ||