ಹತ್ತು ವರ್ಷಗಳ ಹಾದಿ

ಹತ್ತು ವರ್ಷಗಳ ಹಿಂದೆ ಹೊರಟೆ
ಹೊಸತನ್ನು ಬಯಸಿ ಹಿಡಿದೊಂದು ಹಾದಿ
ಏಕತಾನತೆಯ ತ್ಯಜಿಸಿ;
ಹೊಸತನದ ಭ್ರಮೆಯ ಭಜಿಸಿ;
ನೋವು,ಕಹಿ ಮಾತುಗಳ ಭುಂಜಿಸಿ
ಹೊಸ ಚೈತನ್ಯದ ದಿಕ್ಕಿಗೆ ಹೆಜ್ಜೆ ಹಾಕಿದೆ
ಹೊಸ ಬೆಳಕಿಗೆ,ಹೊಸ ಮನ್ವಂತರಕೆ ಸ್ವಾಗತ ಕೋರಿದೆ;

ಹೊಸ ಕೆಲಸ;
ಹೊಸ ಪರಿಸರ;
ಹೊಸ ಗೆಳೆತನ;
ಹೊಸ ಗುರು;
ಹೊಸ ಗುರಿ;
ಹೊಸತು ಹೊಸತು ಮನದಲೆಲ್ಲಾ ಹೊಸ ಹುರುಪು;
ಹತ್ತು ವರುಷ ಅಂಕದ ಚಿತ್ರದಂತೆ ಜಾರಿದೆ;
ನೂರು ಚಿಂತೆ,ಅಸಮಧಾನಕ್ಕೆ ಕೊನೆ ಎಲ್ಲಿದೆ?
ದುಃಖ,ದುಮ್ಮಾನ ಏನೇ ಇರಲಿ,
ಮನದೊಳು ಸಮಾಧಾನವಿದೆ;
ಆತ್ಮತೃಪ್ತಿ ಇದೆ;

ಬೆವರು ಹರಿಸಿ ಮುಗುಳ್ನಕ್ಕಿದ್ದೇನೆ
ಎಲ್ಲವೂ ಸಿಗದೇಯಿದ್ದರೂ ನಗುತ್ತಿದ್ದೇನೆ
ಕಾಯಕವೇ ನಿನಗರ್ಪಿಸಿಕೊಂಡಿದ್ದೇನೆ
ಇಂದು,ಮುಂದೆ,ಎಂದೆಂದಿಗೂ
ನಿನಗೆ ನ್ಯಾಯ ಒದಗಿಸುತ್ತೇನೆ
ಹೊಸತು ಬರಲಿ
ಸತ್ವ ಇಲ್ಲದ್ದು ಮುಳುಗಲಿ
ಹೊಸ ಮನ್ವಂತರದ ಹಾದಿ ತೆರೆದುಕೊಳ್ಳಲಿ
ಮನದ ನೂರು ಚಿಂತೆಯ ಕಳೆದು ಚೈತನ್ಯ ತುಂಬಲಿ
ಅನುಭವದ ಕೊಡ ತುಂಬಿ ಜೀವನ ಹಸನಾಗಲಿ;